Photo Gallery


Putih Kuncup Putih Berembun Tetesan Embun
"Ari sén ilaing teu jalan bel?" Kuring ngahaok angkot nu asup teu make sén. Supir angkot nyureng. Lep, gas ditincak mobil ngadius.
cekiiiiiiit, erém dijejek sataker tanaga. "Hayang paéh sia téh !" Kuring molotot.
Nu dina motor bati nyureng, bangun bingung.
Mobil laju ngageuleuyung dina "kecepatan" 30 km/jam. Asa tumaninah naker, angin ngahiliwir tina jandéla mobil nu muka. "Naha jandéla téh bet hésé ditutup?" gerentes haté kuring
Cekiiiiiiit, erém dijejek deui "Na satéh! sangeunahna ngerem!". Kuring kutuk gendeng. Rét kanu gigireun, nu seurina dipengkek, borondong nu keur ngeukeuweuk setir "Ibu sok nyandak kendaraan nyalira nya ?" ceuk supir angkot.
Rét kana leuengeun, horeng keur ngeukeuweuk tas.
Angkot ngadius ka dayeuhkeun. Karasa jempling, angin ngahiliwir ngusapan sirah.
"Mangga kulemkeun bu, hawatos tadi capé tas nyetir. kin digugahkeun upami tos dugi"
Kuring nyenghél bari peureum hayam.
Cahaya srangéngé, mapaés kélébétna jubah bodas Maulana Hasanuddin. Keris pusaka warisan Wali Songo, nogél dina cangkéngna. Ratusan ustad jeung santri, rempeg munajat ka Alloh SWT satukangeunna.
Lebah medarna srangéngé,ngabedega hiji tangtungan gagah perkasa. Raksukan sarwa hideung, iket mapaés buukna nu panjang. Bedog nyolégréng, tombak pageuh dina rémana nu keker. Mata seukeut, bangun nu hayang ngajojoét jajantung musuh. Dalapan ratus ajar katut ponggawa Pajajaran mapatkeun jampé pamaké, pikeun Pucuk Umun.
Dua hayam jago adu hareupan. Aji urat kawat tulang beusi sarta keris peurahan geus dipasang dina taji hayam Pucuk Umun.
Amarah ngagedur, meuleum jajantung jago Pucuk Umun. Séaaaak! keris peurahan, nyérépét moro jajantung jago Maulana, gilek! ka kénca, sérépét!, angin nu jadi sasaran. Belesat!, jago Maulana ngabelesat ka jomantara, disusul ku jago Pucuk Umun.
Séaaaak, gubraaaaag!!!. Jago Pucuk Umun burakrakan di lemah Gunung Karang. “Allahu Akbar!, Allahu Akbar!”, marengan kerelekna jago Pucuk Umun.
Srog bedog jeung tombak. Pucuk Umun rengkuh.

Share

Label

Total Tayangan Halaman