Lagu éta, lagu nu ku anjeun dipénta, lagu nu nganteur kuring, mawa harepan tepung jeung anjeun.
"Sumping nya! Awas upami heunte!" Mapaés "chating"

Aya nu mimiti rentung sarirungan dina palataran haté nu pinuh ku tatu. Mangsa ungkara-ungkara anjeun ngudar imut dina rumpilna kahirupan. Haté nu mangtaun-taun teuas ngabatu, harita mimiti ngahaneutan.

Naha mangsa harita, mangsa bulan méré lolongrang pikeun ngudar rasa, anjeun teu surti. Kecap "naha", "naha", jeung "naha" teu kungsi kajawab merenahkeun rasa. Harita bulan nyakséni, basa kuring nganti isarah tresna anjeun, nu teu kungsi kapedar. Nu rentung ngan ukur rentung, euweuh lolongkrang pikeun sirungan. Jiwa anjeun ngalayang nganteur haleuangna nyi mojang nu di erok pungsat. Ninggalkeun palataran haté nu laju simpe. Anjeun geuning teu surti.

Kiwari tiap ungkara tina éta lagu, ngawujud jadi rébuan hinis nurihan haté nu geus raca. "Ballade for Adeline" kapireung beuki silung laju hawar-hawar, ninggalkeun palataran haté nu beuki ngaba'alan.