Sakur pasakan nu ku suster diasongkeun ka manéhna, ku kuring ditengetan.
Rét kanu keur ngalimed dahar jeung roladeu.
Balik sakola, aya kasempetan rék prakték nyieun roladeu.
Piraku teu bisa ceuk pikir, tibang roladeu.
Endog dikocok, brus kornét jeung bungbu meunang ngaréndos.
Sarapna, tuluy ngadadar endog diipiskeun, plok adonan kornét kana dadar endog, tuluy digulung, burusut, eusina murusut. kitu jeung kitu nepi ka adonan béak.
Adonan roladeu nu murusut laju digalokeun jeung tarigu, tuluy diseupan. Ceuk pikir piraku teu jadi naget.
Pasosoré sibungsu kaciri bangun nu lungsé.
"Bu, roladeunya mana"
"Jantenna naget kasép"
"Asiiiiik, goreng bu, adé lapar "
"Meser heula tipungna kasép "
Sibungsu getap lumpat kawarung. Top kana loyang nu eusina roladeu gagal. blok digeblokeun, brah ancur.
“Lah naget gagal piraku perkedélmah gagal?” ceuk pikir bari ngemplé-ngemplé pinageteun.
"Bu, nagetnya sudah mateng?" si bungsu ngagorowok.
"Jantenna perkedél kasép"
“Ooooh, kalau gitu supermi diatas kulkas jangan dibikin roladeu ya bu”