Photo Gallery
Ungkara anjeun dibold, dibeureuman jeung diunderline dina lelembutan. Tilu warsih kaliwat éndah lain babasaan. Unggal usik muka hapé ngan ukur hayang ngilikan sms anjeun. Éndah teu lana, musnah sapada harita basa mireungeuh anjeun ngudar sono di dumay jeung manéhna, basa anjeun kawas nu éra deukeut mangsa munggaran jonghok.
Sawarsih katukang, anjeun nangtung na mumunggang gunung, anteng neuteup layung nu hibar. Jilbab bungur tingkélébét katebak angin gunung. Rasa nu teu suda, komo sa’at kuwaktu, nyurung ramo ngadongkang taktak anjeun. Dada anjeun nu ngageter, pageuh rapet diteu’eulkeun kana dada. Cai mata nu murubut, nembus haté ngaburak-barik prasangka goréng.
Jilbab bungur ting kélébét katebak angin gunung, maturan léngkah anjeun nu daria dina galengan sawah. Imut jeung teuteup anjeun nu baheula ngan ukur kasungsi na poto, kiwari ligar na kongkolak mata.
Angin gunung mépéndé anjeun nu tumaninah dina lahunan. “Anggi, geuning basajan impian anjeun téh”.
Langganan:
Posting Komentar
(Atom)
0 comments:
Posting Komentar